الحمد لله على نعمه وآلائه
تم بحمد الله انشاء مدونة ألم فى نفسى بعد طول انتظار منى طبعاً
والحمد لله انى لقيت حد يعلمنى يعنى ايه تدوين
قلت لنفسى يا واد الناس كلها اتعلمت واتنورت ودخلت عالم النت والمدونات والبتاع ده اللى اسمه فيس بوك و الفيس بوك والعياذ بالله معناه ايه قالوا وش الكتاب او كتاب الوش او كتاب الوشوش،المهم انا كنت بقول ايه ؟ آه ايوة كنت بقول اشمعنى يعنى العيال الصغيرين يدخلوا عالم النت انت يا واد يا محمود لسه واقف على الباب متردد !!! متردد ليه ؟ هو انت يعنى علشان عديت الاربعين خلاص يعنى عجزت طب ايه يعنى ؟ ما هوفيه ناس كتير كبار ومحترمين وعندهم مدونات وبعدين يا واد بدل ما انت عمال تهرى و تغل فى نفسك على الاوضاع اللى مش ولابد اللى احنا عايشين فيها اهو تلاقى حاجة تفش غلك فيها ومنك للكمبيوتر تصطفلوا مع بعض بدل ما تفور دمك مع حد يكون حزب وطنى ولا واحد مرشد يوديك فى داهية وانت مش ناقص انا عايز اربى العيال ،ودول تلات عيال وامهم لكن المدونة حد عارف انت مين؟ولا ابن مين ؟ الا اذا بقى اتخبطت فى عقلك واتشهرت وان شاء الله انا مش ناوى على حكاية الشهرة دى ، وكمان مش ها كتب اى معلومات تدل عنى اى مخبر او مرشد والعياذ بالله
واخيراً اتعهد انا صاحب مدونة ألم فى نفسى ان الالم يفضل فى نفسى ومش ها بوح بيه لحد وليشهد على ذلك كل المدونين والمدونات الاحياء منهم والاموات
ملحوظة : اشكر الاستاذ محمد خيرى صاحب مدونة جر شكل والاستاذ احمد محمود صاحب مدونة لواء الاسلام على مساعدتى فى تعلم التدوين وانشاء المدونة
skip to main |
skip to sidebar
ألم فى نفسى
راجل عنده دم